بالنسبة للمكالمة سألتني في الاول بالعربي حضرتك استاذ كذا تمام معاك كذا من شركة ساذرلاند جلوبال كنت بعتلنا ال CV وظيفة Customer Service Agent مظبوط و قلبت بعدها كله انجليزي لحد ما قفلت ( كلمني عن نفسك - عندك مانع تشتغل شيفتات بليل - بعدها كلام عن الشركة و عن ان مرحلة التوظيف عندهم بتتم على شكل خطوات و كده و ميعاد الانترفيو تاني يوم مع اسم الشخص اللي هيعمله - اللبس ممكن فورمال او سيمي فورمال )

رحت قبل الميعاد بشوية سألت واحدة هناك عن اللي هتعمل معايا المقابلة دخلت مكتب و جابتلي ابليكيشن مليته اديتهولها دخلت المكتب مرة تانية طلعت اللي هتعمل معايا المقابلة خدتني و رحنا مكتب تاني و المقابلة كانت 20 - 25 دقيقة كلها بالانجليزي من ساعة ما هي طلعت من المكتب الاولاني لحد ما خلصت و مشيت مقالتش كلمة عربي

الأسئلة
ممكن تقدم نفسك - تعرف ايه عن ايجنت خدمة العملاء - تعرف ايه عن شركتنا - مين هو مثلك الاعلى - مجال دراستك كان في ايه - ليه مش شغال فيه - ايه اهم انجاز في حياتك - عملت معايا زي اختبار انها عميلة بتكلمني في التليفون و بتسألني عن الفاتورة بتاعتها و فيه عندها مشكلة انها سابت شغلها و مش هتقدر تدفعها و انا برد عليها - ادتني كراسة علشان ابيعها ليها - كلمني عن شغلك السابق - دي تقريبا كل او معظم الاسئلة و كلها كانت بالانجليزي طبعا و مطلوب الرد عليها بالانجليزي

ملحوظة مهمة : الشركة هناك نضيفة جدا جدا و الناس معاملتهم ودودة و محترمة جدا و المقابلة مكنش فيها اي توتر و لا ضغط و لا اي حاجة بالعكس تحس ان الموضوع كله دردشة ودية محدش يخاف ان الحوار كله انجليزي و يتوتر دي نصيحتي للي هيقدم الموضوع سهل ان شاء الله - الشركة فيها ناس اجانب شغالين - واضح ان كل الاكوتنتات اوف شور و الله اعلم

تم بحمد الله و دي كل حاجة بالتفصيل الممل يا رب محدش يكون زهق مني 
و تحت امركم في اي استفسار و ياريت اي حد يقدم و يعمل انترفيو هناك يحكي اللي حصل معاه برضه للاستفادة - ربنا يوفق الجميع